काठमाडौँ-
जलनबाट घाइते भई वीर अस्पतालमा उपचार गराइरहेका मुगुका युवा गणेश नेपालीको निधन भएको छ ।
काठमाडौँको त्रिपुरेश्वरमा बिहीबार आफैँले शरीरमा आगो लगाएका नेपालीको ‘आइसियु’मा राखेर उपचार गरिरहेका अवस्थामा शुक्रबार निधन भएको वीर अस्पतालका प्रवक्ता डा प्रकाश बुढाथोकीले जानकारी दिएका छन् ।
अस्पतालका प्लास्टिक सर्जरी विभागका संयोजक डा पियुष दाहालले निरन्तर रुपमा अथक प्रयास गरे पनि बिहान ११ः१९ बजे नेपालीको निधन भएको बताए । डा दाहालले नेपालीको जीवनरक्षाका लागि चिकित्सक, अस्पताल, प्रशासन र सरकारले बिहीबारदेखि निरन्तर प्रयास गर्दा पनि बचाउन नसकिएको बताए । चिकित्सकहरुका अनुसार उनको शरीर गम्भीर रुपमा जलेको थियो ।
सरकारले जलनबाट घाइते नेपालीको उपचारमा विशेष चासो राखेपछि संयोजक डा दाहालको नेतृत्वमा प्लास्टिक विभाग, क्रिटिकल केयर, एनेस्थेसिया र नर्सिङ सेवाका स्वास्थ्यकर्मीसहित २१ सदस्यीय विशेष चिकित्सकीय टोली खटिएको थियो ।
यसअघि अस्पतालले पत्रकार सम्मेलन गरी शरीरको करिब ५५ प्रतिशत भाग जलेको नेपालीको स्वास्थ्यावस्था गम्भीर रहेको जानकारी दिँदै विशेष टोलीको व्यवस्थासहित ज्यान जोगाउन अथक प्रयास गरे पनि सम्भव नभएको बताएको थियो ।
नेपाल सरकारले थप उपचारका लागि एयर एम्बुलेन्सको व्यवस्थासहित भारत लैजाने तयारी पूरा गरे पनि चिकित्सकहरुले उहाँको अवस्था निकै जटिल रहेकाले तत्काल सघन उपचार कक्षबाट निकाल्न नहुने सुझाव दिएपछि नयाँदिल्लीस्थित एम्स अस्पताल लैजान नसकिएको हो ।
नेपालीको मृत्यु भएपछि विभिन्न क्षेत्रबाट सरकारको आलोचना भएको छ ।
